Wopłóčkowy koncept přiměrjeny

štwórtk, 07. meje 2020
artikl hódnoćić
(0 )

Gmejna Slepo je wjacore ležownosće z nuzoweho přizamknjenja k wopłóčkowej syći wuwzała. Hač do kónca lěta pak dyrbja wobsedźerjo swoje připrawy na biologiske wotstronjenje přetwarić.

Slepo (CK/SN). Z jednym hłosawzdaćom su zapósłancy Slepjanskeje gmejnskeje rady předwčerawšim štwórte přiměrjenje wopłóčkoweho koncepta wobzamknyli. Z hospodarskich a techniskich přičin je móžno ležownosće z nuzoweho přizamknjenja k centralnej wopłóčkowej syći wuswobodźić. Tam maja wopłóčki decentralnje w biologiskich małorjedźernjach abo w zběrnikach wotstronjeć. Wobstejace mechaniske čisćernje dyrbja wobsedźerjo ležownosćow hač do 31. decembra na biologiske přetwarić. Spěchowanske srědki za to wudawachu jenož hač do lěta 2015. Hórnistwa dla pak běchu dobu za Slepo-juh, Trjebink a Rowno dwójce podlěšili.

Za Rowno planowanje hišće dokónčene njeje, rjekny nětko nawoda twarskeho zarjada Steffen Seidlich. „Rozsudźimy-li wo tym za dwě lěće, hakle potom njemóža wobydlerjo spěchowanje 1 500 eurow hižo dóstać“, wón wujasni. Tohodla su ležownosće postajili, kotrež hodźa so technisce jeno ćežko přizamknyć, na přikład njehospodarskosće dla, dokelž su předaloko wot rołow centralneje syće zdalene. Dohromady su to dwě ležownosći a wuhibkarnja Němskeje železnicy w Slepom kaž tež 17 ležownosćow w Rownom. Jako kriterij mjenowaše Seidlich kóšty 5 000 eurow jeničce za hłubokotwarske dźěła. „Wšitko nad sumu je za přizamknjenje jeničkeje ležownosće njehospodarske“, wón rozłoži. Gmejna ma nětko ležownosće Sakskej natwarnej bance přizjewić, hač do kónca lěta dyrbja wobsedźerjo wopłóčkowe rjedźernje na biologiske přetwarjene měć a wudawki wotličić.

Na žurli Slepjanskeho Serbskeho kulturneho centruma běchu stólcy za radźićelow kaž tež hosći w předpisanym wotstawku spřihotowane. Wjesnjanosta Reinhard Bork (njestronjan) dźakowaše so wobydlerjam za zrozumjenje nastupajo wobmjezowanja koronawirusa dla, „kotrež je k stabilizaciji situacije přinošowało. Naprawy pak žnějachu tež kritiku. Štó dźě ma w tajkej ekstremnej situaciji hižo hotowe rozrisanje paratne?“

W Slepjanskej gmejnje smědźa dźěći wšitke hrajkanišća wotnětka zaso wužiwać. Starši maja zamołwić, zo wone postajeny wotstawk dodźerža.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND