Loni zrudoba, lětsa wjeselo

štwórtk, 07. meje 2020
artikl hódnoćić
(0 )
Z trěbnym mjezsobnym wotstawkom, nic pak k temam gmejny, su Chróšćanscy gmejnscy radźićeljo wčera wuradźowali.  Foto: Jan Kral Z trěbnym mjezsobnym wotstawkom, nic pak k temam gmejny, su Chróšćanscy gmejnscy radźićeljo wčera wuradźowali. Foto: Jan Kral

Chróšćanska gmejna mjez dobyćerjemi sakskeho wubědźowanja

Chrósćicy (JK/SN). Tež gmejnska rada Chrósćicy je swoje prěnje posedźenje pod wuměnjenjemi koronapandemije wotměła. Na nowym městnje a z trěbnym wotstawkom we wjacezaměrowej rumnosći „Jednoty“ wěnowachu so radźićeljo wčera wjacorym nadawkam.

Prjedy hač zabrachu stejišćo k twarskim próstwam wobydlerjow, předstaji zastupjer energijoweho zastaraćela ENSO skrótka zrěčenje z gmejnu nastupajo přestajenje nadróžneho wobswětlenja na LED-techniku. Wobsah a nadrobnosće běchu hižo w měrcu rozjimali, nětko dźěše wo formulaciju zrěčenja. Z jednohłósnym wobzamknjenjom móže ENSO planować započeć. W běhu přichodnych dwanaće měsacow budu krok po kroku wobswětlenje přestajić a přidatnje wosom lampow nastajić.

Dalši wažny rozsud bě, schwalić koncept hladanja a wobhospodarjenja wodźiznow druheho rjadu. Tež wo tym běchu so radźićeljo na minjenym posedźenju dokładnje wobhonili. Nětko započnje Radebergski běrow Stowasser z trěbnymi přihotami. Tak je zaručene, zo gmejna spěchowanske srědki, kotrež Sakska za to přewostaja, zmysłapołnje nałoži.

Wobšěrnišo diskutowachu radźićeljo wo tym, kak pawšalu za dróhotwar wužiwać. Wobsteji mjenujcy móžnosć, za lětsa předwidźane pjenjezy do klětušeho přewzać a potom wjetši projekt zwoprawdźić. Lětsa bychu ně­hdźe 32 000 ­eurow měli a klětu hišće raz samsnu sumu. Ze stajnje dźesać procentami swójskeho podźěla móhli potom snano 70 000 eurow wudać. W gmejnje maja z dróhu z Chrósćic do Hórkow, z pućomaj do Łusča kaž mjez Nuknicu a Lejnom tři dróhotwarske ćežišća, hdźež dyrbja jednać. Po tym zo běchu so radźićeljo dojednali, pjenjezy hakle klětu zasadźić, rozsudźichu so po horcej diskusiji a napominacych słowach wjacorych radźićelow skónčnje za puć mjez Nuknicu a Lejnom, při čimž pak tamnej z wočow njezhubja.

Wulku překwapjenku měješe wjesnjanosta Marko Kliman (CDU) na kóncu, jako informowaše přitomnych wo dobyćerjach wubědźowanja wo ideje za žiwjenje na wsy. Hižo loni běchu so Chróšćenjo wobdźělili, njemějachu pak zbožo. Lětsa su 250 000 eurow dobyli, a to za zapodaty projekt „Zahroda za wšěch“, wokolny puć po wsy w Chrósćicach, hdźež ma bywši gmejnski zarjad srjedźišćo być.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND