Myto Chróšćanskej gmejnje ma na dobro wobydlerjow być
Chrósćicy (JK/SN). To wšak bě wosebita a wurjadna překwapjenka, jako Chróšćanski wjesnjanosta Marko Kliman (CDU) na kóncu zjawneho dźěla posedźenja gmejnskeje rady dźens tydźenja w tamnišej „Jednoće“ kóčku z měcha pušći, prezentujo radźićelam film z wozjewjenjom dobyćerjow sakskeho wubědźowanja, za kotrež běchu swoje ideje za čiliše wjesne žiwjenje zapodali.
Njebě to žane z tróštowych mytow, ale tónraz je gmejna woprawdźe njewšědne a tola zasłužene zbožo měła. W kategoriji „Wuwiće zhromadneho žiwjenja a zwjazanosće“ doby wona 250 000 eurow za projekt „Jedyn puć za wšitkich – Chrósćicy wšitkich pohibuja“. Projekt je kołopuć po Chrósćicach, zapřijacy wšitke generacije wobydlerjow a hosći wsy w zhromadnosći. Puć za wšěch měł zwjazać naměsto za wšěch z domom za wšěch a runje tak zahrodu za wšěch z trawnikom za wšěch.