Njebjelčicy (JK/SN). Komunalne a čestnohamtske dźěło njeje za kóždeho. Za to trjebaš lóšt kaž tež wosebity dar a nutřkowny pohon, něšto wuskutkować. Runje to měještaj Křesćan Žur a Daniel Wätzig, kotrejuž je Njebjelčanski wjesnjanosta Tomaš Čornak (CDU) na minjenym posedźenju gmejnskeje rady z wulkim dźakom rozžohnował. Wobaj staj wjele lět wuspěšne wuwiće gmejny sobu postajałoj.
Křesćan Žur bě wjacore legislaturne periody spušćomny zastupjer wjesnjanosty a zamó naroki gmejny skutkownje zwoprawdźić. Tajke dźěło bě zwučeny, wšako bě wjele lět sobudźěłaćer zapósłanca CDU w zwjazkowym sejmje Ulricha Klinkerta. Při tym je sej přiswojił wěsty wid na politiske kaž tež komunalne dźěło a móžeše nazhonjenja w gmejnskim dźěle na dobro gmejny derje nałožować. Njeje so tež bojał wjesnjanosće w napjatych situacijach znapřećiwić, swójske měnjenje zwuraznić a je runje tak wopodstatnić. Ke chutnym rozestajenjam pak ženje dóšło njeje, wšako bě Žur zdobom diplomat a čłowjek měrneho wašnja.