Zmužitosć słuša ke kóždemu spočatkej. „Wšo dalše slěduje. Je wažne nowotarstwo njewotpokazać, ale je wuhotować“, wopisuje Karsten Herden w Běłej Wodźe swoje wašnje žiwjenja. Na namjet Zwjazka 90/Zelenych přisłuša wón přiradźe za serbske naležnosće Zhorjelskeho wokrjesneho sejmika.
Wotrostł je Herden w Radojzu (Radeweise) pola Grodka. 1986 bu jeho ródna wjes wotbagrowana. Něhdźe 200 wobydlerjow su přesydlili. „Naša swójba drje nima serbske korjenje“, praji 40lětny, kiž je mjeztym Běłowodźan. „Tradicije a nałožki, kaž debjenje jutrownych jejkow a mejestajenje a -mjetanje, pak słušeja stajnje hižo k mojemu žiwjenju. Za mnje jako dźěćo na wsy bě to normalita.“ Jeho dźěd Heinz Koalick bě hač do lěta 1985 wjesnjanosta w Radojzu, wowka Charlotte nawjedowaše konsumowu předawarnju. Po přeću staršeju nawukny Karsten Herden po wuchodźenju šule w Grodku powołanje kachlicarja. Žiwidłowa branša pak jeho bóle wabješe. Tak sta so z kucharjom a wukubła so pozdźišo na fachoweho hospodarja. Dwě lěće nawjedowaše w Běłej Wodźe kuchnju. Wot lěta 2018 dźěła wón jako hospodarski nawoda Budyskeje hladarnje na Židowje.