Ze stolětneho duba w Brězowce bajowa postawa nastała

Brězowka (AK/SN). Z wjace hač sto lět stareho duba je Slepjanski drjeworězbar Thomas Schwarz wot měrca tohole lěta skulpturu wódneho muža tworił, kotraž steji nětko w Brězowce. „We wobliču wódneho mža zjednoćeja so pryzle kaž tež dobroćiwosć. Zwisk ze wsu bě mi při tym wažny“, rjekny wuměłc minjeny pjatk při wotkryću skulptury. Domowinska skupina bě na zarjadowanje přeprosyła.

Bjezposrědnje nad motiwom wódneho muža steji serbske mjeno wsy Brězowka. K skulpturje słuša ławka, na kotrejž su widźeć ryby, woda a žołmy. „Ławka nasta z wjerška duba“, powěda Thomas Schwarz. Skulptura steji wosrjedź lipoweho hajka. „Je to moja třeća postawa wódneho muža. 2014 sym tajku za Radowizu (Radewiese) pola Mosta (Heinersbrück) w Delnjej Łužicy twarił, lěto pozdźišo slědowaše ławka z wódnym mužom, błudničkami a lutkami za Witaj-pěstowarnju ,Milenka‘ w Rownom.“