Z Pitom po łužiskej jězorinje kolesować a myto dobyć

póndźela, 17. awgusta 2020
artikl hódnoćić
(0 )
Za swójby z dźěćimi maja z hódančkowej kolesowanskej čaru we łužiskej jězorinje dalši atraktiwny poskitk.  Foto: Nada Quenzel Za swójby z dźěćimi maja z hódančkowej kolesowanskej čaru we łužiskej jězorinje dalši atraktiwny poskitk. Foto: Nada Quenzel

Zły Komorow (AK/SN). Turistiski zwjazk Łužiska jězorina je hódančkowu čaru „Wot hórnika k namórnikej“ za kolesowacych pućowarjow wokoło Złokomorowskeho a Lejnjanskeho jězora wuwił. „Wona swójby z dźěćimi w starobje zakładneje šule přeproša, změnu krajiny wot hórniskeho rewěra k wočerstwjenskemu paradizej na kolesu aktiwnje dožiwić. 37 kilometrow dołha čara wjedźe wokoło Lejnjanskeho a Złokomorowskeho jězora“, rozłožuje Katja Wersch, sobudźěłaćerka turistiskeho zwjazka za zjawnostne dźěło a marketing.

Hłowna figura hódančkoweje kolesowanskeje čary je Pit, maskotka łužiskeje jězoriny. Na wosom stacijach Pit dźěći namołwja na prašenja wotmołwić. Jězba započina so při Kóšynskim kanalu do Złokomorowskeho jězora. Tam steješe něhdy hoberski bager Ds 1120, wudobywacy čorne złoto z brunicoweje jamy. Druha stacija je markantna wěža „Zerzawy hózdź“, hdźež so Zornowski kanal wuliwa. Tón zwjazuje dźensa Lejnjanski jězor ze Sedlišćanskim. Z wysokeho wuhladnišća widźa wopytowarjo we wokolinje wjacore wsy a jězory.

Čara wjedźe dale k Borborinemu kanalej, k płuwacym domam na južnym při­brjohu Lejnjanskeho jězora, k spušćadłowemu domej při Kóšynskim kanalu, ke křiwej wěži při Złokomorowskim jězoru hač k tamnišemu přistawej. Na wěstych městnach maja dźěći na prašenja wotmołwić. Za to dyrbja informaciske tafle po puću dokładnje čitać a to a tamne wobkedźbować. Tak prašeja so za mjenami, barbami a ličbu schodźenkow. Swójby z mjeńšimi dźěćimi móža čaru tež po dwěmaj etapomaj z 19 a 18 kilometrami jěć.

Wotpowědny flajer dóstanu zajimcy w turistiskich informacijach Złeho Komorowa, Wojerec a Złokomorowskeho přistawa abo internetnje pod www.lausitzerseenland.de. Wšitke dźěći hač do 14 lět, kotrež so na hódančkowej kolesowanskej jězbje wobdźěla a na prašenja prawje wotmołwja, dóstanu darik.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND