Nimo wulkich nadregionalnych serbskich towarstwow, kotrež su často w medijach prezentne, mamy w dwurěčnej kónčinje njeličomne mjeńše a małe towarstwa, kotrež runje tak pilne dźěło wukonjeja. Wo nich pak přewjele njezhoniš. W swojej lětnjej seriji lětsa tajke aktiwne cyłki předstajamy, dźensa Ćišćanska rejwanska skupina (13).
W lěće 1997 swjećachu w Ćisku 750. róčnicu prěnjeho naspomnjenja wsy. Zo bychu w swjedźenskim ćahu na něhdy ryzy serbske sydlišćo skedźbnili, chcychu w nim tež wobraz z tradicionalnymi serbskimi rejemi swojich prjedownikow we Wojerowskej serbskej drasće pokazać. Za to dobychu tehdy wosom porow. Wone so po swjedźenju rozsudźichu, přichodnje dale zhromadnje rejwać. Tak dóńdźe k załoženju Serbskeje rejwanskeje skupiny Ćisk. Prěnja předsydka lajskowuměłskeho cyłka bě Edith Zinkowa. K swojim probam zeńdźechu so na žurli hosćenca „K zelenemu wěncej“, hdźež tež dźensa zwučuja. Cyłk wobsteji tuchwilu z 18 aktiwnje sobuskutkowacych porow.