Štóž nuznje lěkarsku pomoc trjeba, so nadźija, zo je ta spěšnje na městnje. To je nadawk wuchowanskich stražow. Jednu tajku su w Rakecach twarili. Wot wčerawšeho wona dźěła.
Rakecy (SN/MWj). Z přetřihanjom symboliskeho banćika přepodachu wčera, srjedu, na terenje bywšeho Rakečanskeho knježeho dwora nowu wuchowansku stražu. Z njej Budyski wokrjes swoju syć tajkich stražow dale rozšěrja, rjekny přirjadnik krajneho rady Udo Wićaz. Nowa straža je jedna z třoch wotnožkow Budyskeje wuchowanskeje straže a jedna z dohromady 17 stražow wokrjesa.