Idejowe wubědźowanje sakskeho ­fondsa „Čiń sobu!“ je we wosebitej ­kategoriji „Žiwa dwurěčnosć“ tworićelskosć na dobro našeje maćeršćiny ­znowa pozbudźiło. Serbske Nowiny ­tule w serialu rjad drobnych a małych projektow předstajeja.

Jako słyšachu w Serbskim dźěćacym towarstwje Ćisk wo sakskim fondsu „Čiń sobu!“, bě Brunhilde Richter hnydom přeswědčena so wobdźělić. Ćišćanka podpěruje hižo wjacore lěta wjes a jeje aktiwity. Předewšěm dźěći su 69lětnej wutrobna naležnosć. Jako bywša pěstowarka wona tuž rady serbske dźěćace towar­stwo we wsy podpěruje. Jeho předsydka Annett Rösler a dalši čłonojo cyłka běchu tohorunja hnydom zahorjeni, zo měło so towarstwo na idejowym wubě­dźowanju wobdźělić. Tak rozłoži předsydstwo wšitkim čłonam towarstwa móžnosć, z pomocu fondsa dwurěčnosć w regionje naslědnje spěchować. Zaměrnje chcedźa tuž ze swojim předewzaćom dźěćom dale rěč, tradicije a stawizny Serbow­ spřistupnjeć.