Rewitalizacija Klóšterskeje wody w Nowej Wjesce je hižo wot kónca oktobra twarsce dokónčena. Nětko chcedźa tam štomiki a kerki sadźeć, zo bychu cyłkowny projekt wotzamknyli.
Nowa Wjeska (SN/MWj). Wot spočatka tohole tydźenja chcyše krajne zarjadnistwo rěčnych zawěrow při Klóšterskej wodźe w Nowej Wjesce štomiki a kerki sadźeć dać. W zwisku z rewitalizaciju rěki a z tym zwisowacymi wobšěrnymi twarskimi dźěłami běchu tam 53 štomow podrězali a wjacore kerki wotstronili. Zo bychu je narunali, planuja 113 nowych štomikow a kerkow. Po informaciji krajneho zarjada bě planowane je minjenu póndźelu sadźeć započeć. Po wšěm zdaću pak budźe to hakle wot 20. nowembra. Najprjedy dyrbi zahrodniska firma wšitko přihotować, dokładne městna postajić a so z ludźimi dorěčeć, kaž zamołwita za zjawnostne dźěło krajneho zarjada Katrin Schöne na naprašowanje SN zdźěli. Nimo toho móže štomowa šula dźěl předwidźanych rostlin hakle po prěnim zmjerzku dodawać.
