Pančicy-Kukow (aha/SN). Wjele lět skićeše rozpadowacy twarski kompleks z bywšim hosćencom wosrjedź Pančic-Kukowa njerjany a wohańbjacy napohlad. Wjesnanosta Markus Kreuz (CDU) so za to zasadźi, zo je gmejna před lětomaj areal kupiła. Lětsa po jutrach započa firma z Hućiny rozpadowacy hosćenc torhać. Mjeztym je dźěło zakónčene a 3 500 kwadratnych metrow wulki areal skići dospołnje změnjeny wobraz. Wot zeleneje oazy wjedźe po nahłej skłoninje schód ke kapałce.
Klětu nalěto změja mnozy do Pančic-Kukowa přichadźacy hosćo swoje wjeselo nad tym, zo tam po cyłej łuce narcisy, krokusy a hyacinty kćěja. Wo to su so minjenu wutoru dźěći tamnišeho horta postarali. Pozadk je, zo je so Miłočanski Křesćansko-socialny kubłanski skutk (CSB), přizamknjeny towarstwu Zahrodowa kulturna šćežka Hornja Łužica, hižo minjene lěto wobdźělił na akciji tykać kwětkace cyblički. Po tym zo su to loni na Klóšterskej zahrodźe činili, wjesnjanosta poskitk CSB witaše, zo z lětušej akciju zelenišćo mjez Klóšterskej wodu a mjeztym derje widźomnej kapałku z kwětkami zwosadźeja.
