Lětsa je wšitko trochu hinaše, tež wokoło hodownych swjatych dnjow. Koronakriza wšitkich nući kontakty miniměrować. Přiwšěm kroča mnozy zdźěla njewšědny puć, swoje předewzaća zwoprawdźić. Tež w Róžeńće su móžnosć namakali, zo njetrjebaja so lětsa hodowneje stawizny wzdać.

Róžant (SN/JaW). W Róžeńće kroča młode swójby njewšědne puće, zo bychu tež lětsa patoržicu hodownu stawiznu předstajili. Kaž zdźěli Diana Šołćina na naprašowanje našeho wječornika, su so „dźěći hižo w oktobrje prašeli, što lětsa z hodownej stawiznu budźe“. Jasne wšak bě, zo hru kaž minjene šěsć lět předstajić njemóža. Róžeńčanka chcyše tuž sceny tak spisać, zo w jednej jenož bratřa a sotry abo rjadowniske cyłki zhromadnje wustupja. Mjeztym je pak tež jasne, zo scyła live hrać njemóža. Zrodźichu tuž mysl, sceny natočić a film zdźěłać. Tak su zdobom njewotwisne wot toho, hač budźe patoržicu w Róžeńće nyšpor abo nic, film na kóždy pad pokazaja.