Kamjenc (SN/MWj). Štóž je sej za nowe lěto předewzał, swojemu ćěłu něšto dobre popřeć a přiwšěm kaž asket žiwy njebyć, za toho je snano Kamjenski čajowy kontor na Budyskej dróze prawa adresa. Tam mjenujcy Kralec mandźelskaj Petra a Joachim ze Smjerdźaceje mjeztym hižo wosom lět najwšelakoriše čaje z cyłeho swěta poskićataj a swojich kupcow tež serbsce poradźujetaj. Tehdy bě wjelelětna mějićelka na wuměnk šła, a Kralec mandźelskaj staj wobchod přewzałoj.

Dźensa drje poskićujetaj wonaj tež ­oliwowe wolije, palency, whisky, rum a słódčizny, čaj pak je hłowny wobstatk jeju předewzaća. Paleta je přewšo wobšěrna a hodźi so jeno ćežko zjimać. Ně­hdźe 200 družin čajow je w Kamjencu w po­skitku. Wone pochadźeja z Nepala, Japanskeje a Chiny runje tak kaž z Afriki a Južneje Ameriki. Tež zelowe a płodowe čaje z Europy a zdźěla z Němskeje w jednotliwych tyzach na polcach wuhladaš.