Twarske dźěła na Chróšćanskim Božim domje zaso běža

Chrósćicy (SN/JaW). Něšto dnjow po tym zo je wobswětowy zarjad wokrjesa Budyšin minjeny pjatk twarske dźěła při Chróšćanskej farskej cyrkwi nachwilnje zakazał, tam wot wutory zaso dźěłaja. Dodźeržeć pak maja „wěste wuměnjenja“, kaž krajnoradny zarjad na naprašowanje našeho wječornika zdźěli. „W přichodnymaj tydźenjomaj fachowcy wokoło cyrkwje dale róšty stajeja“, zdźěli na naprašowanje zamołwity architekt Marko Dźisławk. Při tym pak dyrbja wobkedźbować, zo trěbne škitne saki při róštach hač do hornjeje etaže njepójšeja, zo njebychu lětanske čary njetopyrjow mylili. Paralelnje „fachowc za njetopyrje cyłu fasadu, wšitke škałoby w njej a ewentuelnje městna, na kotrychž móhli so njetopyrje chować, kontroluje a zwěsći, hač maja tež w muri Božeho domu swoje kwartěry. Na zakładźe swojich zwěsćenjow wón potom dowoli, zo směmy dale twarić, abo wukaza dalši twarski stop. Nimo toho dyrbi njetopyrjowy fachowc wotnětka cyłe twarske naprawy přewodźeć“, Dźisławk wuswětli.