Kapałka nošny stołp kruteje zhromadnosće

pjatk, 25. junija 2021
artikl hódnoćić
(0 )
Farar Měrćin Deleńk je wčera na swj. Jana patronatne kemše w Dobrošicach swjećił.  Foto: Alfons Handrik Farar Měrćin Deleńk je wčera na swj. Jana patronatne kemše w Dobrošicach swjećił. Foto: Alfons Handrik

Dobrošicy (aha/SN). Před 30 lětami su w Dobrošicach kapałku swj. Janej Křćenikej poswjećili. 24. junija 1992 wotměchu w njej na česć patrona Božeho domu swjedźeń. Wot toho časa činja to kóžde lěto, tak tež wčera. Farar Měrćin Deleńk skedźbni w prědowanju na to, zo steji mjeno Jan za dźěło a prócu a je hač do dźensnišeho přikład.

K tójšto zajimawym rozmołwam dóńdźe wčera po Božej mši před kapałku. Starši kemšerjo so dopominachu, kak běchu před wjac hač sydom lětdźesatkami na samsnym městnje w tehdyšej kapałce – z Róžanta přenjesenej barace – Bože słužby swjećili. Hakle na iniciatiwu wjacorych Dobroščanow a Hórčanow so wuměnjenja změnichu. Borbora Krječmarjowa, kotrejž bě 33 lět, jako bu nowy ­Boži dom poswjećeny, zwjeselena rjekny: „Składnosć, kóždu srjedu we wsy kemše swjećić, je nam přewšo witana. Wěmy sej našu ‚katedralu‘ jara wažić.“ Cecilija ­Šěnowa ma za wažne, „zo je kapałka ­nošny stołp kruteje nabožneje a narodneje wjesneje zhromadnosće“.

wozjewjene w: Lokalka
Prošu přizjewće so, chceće-li komentar podać

nawěšk