Z wjesołym swjedźenjom su sobotu w Nowej Jaseńcy hrajkanišćo oficialnje přepodali. W swjedźenskim stanje bjesadowaše wulka ličba ludźi při šalce kofeja a słódnym tykancu, kotryž běchu wjesne žony napjekli.
Nowa Jaseńca (SN/MiR). Hižo pjatk wječor běchu wćipni nimo hrajkanišća njedaloko busoweho zastanišća w Nowej Jaseńcy šli a zwěsćili, zo je swjedźenski stan natwarjeny runje tak kaž wóz za napoje. Štož pak sobotu popołdnju wosebje na dźěći čakaše, bě wulka překwapjenka. Najbóle wabješe wězo hrajkanišćo, na kotrymž so dźěći wšeje staroby zabawjachu. Dale wužichu woni składnosć, na konju jěchać abo na wšelakich jězdźidłach po terenje jězdźić. Ryćerjec transportne předewzaće bě přihotowało słódnu cokorowu watu a wulki kwader lodu, z kotrehož sej dźěći z hamorom słódkosće wubiwachu.