Wosebity wjeršk měšćanskeho swjedźenja wjele ludźi přiwabił
Kamjenc (SN/MWj). Grandiozne, wulkotne, krasne, njepředstajomne – tajke a wjele dalšich adjektiwow bě sobotu na Kamjenskej Pastwinej horje słyšeć. Tam su wot ranja w šesćich wysoku wěžu z jědnaće hač do 14 metrow dołhimi plećenymi šlebjerdami zakryli a tak akciju zwoprawdźili, kotruž běchu wjacore měsacy dołho přihotowali. Jednotliwe boki wěže wěnuja so 800. jubilejej města Kamjenca runje tak kaž temam přiroda, putnikowanje a zbožo. Derje widźeć bě mjez druhim serbske lipowe łopješko.
Nimo dalšich zajimcow běchu předewšěm žony přišli, kotrež běchu k poradźenju sobu přinošowali a jednotliwe małe štyriróžki napletli. Mjez nimi běštej Lucija Weclichowa z Pěskec a Weronika Cyžowa z Njebjelčic. Wobě běštej z wuslědkom jara spokojom, byrnjež wón na wěži jenož jenički dźeń widźeć był. Wječor wot wosmich mjenujcy su plećene šlebjerdy zaso z wěže dele wzali. Wone budu přichodny čas mjez druhim w Kamjenskej cyrkwi swjateje Marije a na nutřkownym dworje radnicy widźeć.