Stajnje druhu njedźelu w septembrje wotměwa so po cyłej Němskej dźeń ­wotewrjeneho pomnika. Po tym zo ­dyrbješe wón loni korony dla wupadnyć, móžeš nětko přichodnu njedźelu zaso na mnohich městnach za kulisy historiskich twarjenjow hladać.

Budyšin (SN/MWj). Takrjec hornjołužiske srjedźišćo dnja wotewrjeneho pomnika njedźelu, 12. septembra, je bjezdwěla Budyšin. Tu móža sej zajimcy na dokładnje 23 městnach historiske zajimawostki wobhladać. Mjez twarjenjemi, kotrež hewak přistupne njejsu, su palais na Hornčerskej čo. 34, wila Charloty na Walskej čo. 1, historiska róla na Wonkownej Lawskej čo. 16 a barokne twarjenje na Mjasowych jětkach čo. 7. Na Hłownym torhošću budźe w 10 hodź. oficialne zahajenje. Cyły dźeń chcedźa tam pisany program poskićeć, a Wawrikec catering budźe so wo ćělne derjeměće wopytowarjow starać.