Jedne lěto pochowanski lěs

štwórtk, 28. oktobera 2021
artikl hódnoćić
(0 )
Městno za nutrnosće z třěchu a ławkami je centralny dypk Kamjenskeho pochowanskeho lěsa pola Brunowa.  Foto: Jana Gieß Městno za nutrnosće z třěchu a ławkami je centralny dypk Kamjenskeho pochowanskeho lěsa pola Brunowa. Foto: Jana Gieß

Kamjenc (SN/MWj). Swój posledni zemski wotpočink wosrjedź přirody měć je mjeztym jedne lěto w Kamjenskim pochowanskim lěsu móžno. 38 hektarow wulki lěs zapadnje Kamjenca pola Brunowa je po swojim wotewrjenju 30. oktobra 2020 woblubowana alternatiwa k tradicionalnemu kěrchowej abo pohrjebnišću, rěka w nowinskim zdźělenju předewzaća Friedwald tzwr. Wjace hač 450 ludźi je so mjeztym za štom abo městnosć w pochowanskim lěsu rozsudźiło. Wjace hač sto zemrětych su hižo při jich štomje pochowali.

„Je dźeń a wjace wobydlerkow a wobydlerjow, kotřiž sej posledni wotpočink wosrjedź přirody přeja. W Kamjencu je so tele přeće w załoženju wobydlerskeje iniciatiwy wotbłyšćowało. Wjace hač 700 ludźi je so tehdy za to wuprajiło, pochowanski lěs wutworić. Wulki wothłós po wotewrjenju před lětom je pokazał, zo mamy z pochowanskim lěsom nětko městnosć, kotraž dawa ludźom składnosć, so dostojnje a indiwiduelnje roz­žohnować, so dopominać a spominać“, praji Kamjenski wyši měšćanosta Roland Dantz (njestronjan). Město je nošer pochowanskeho lěsa.

wozjewjene w: Lokalka
Prošu přizjewće so, chceće-li komentar podać

słowo lěta 2020

nawěšk