Kamjenc (BG/SN). 75lětny gitarist a spěwar Thomas „Monster“ Schoppe je jenički hišće žiwy hudźbnik z prěnjeje wobsadki Lipšćanskeje kapały Klaus RenftCombo (pozdźišo Renft). Na koncert ­minjenu sobo­tu w Kamjenskim měšćanskim dźi­wa­dle k 50. róčnicy wobstaća kapały běchu­ wopytowarjo ze wšěch kónčin do Les­singoweho města přijěli. To wobkruća, zo jónkrótna wuchodoněmska rocko­wa hudźba ludźi dale wabi, tež hdyž je kruh publikuma mjeztym sam w rentnarskej starobje. Přiwšěm je skupina dale woblubowana a ma swojich přiwisnikow.

To pokaza so hižo z prěnim spěwom „Zwischen Liebe und Zorn“. Tekst z časa załoženja skupiny pochadźa z pjera legendarneho opoziciskeho basnika Ge­rulfa Pannacha. Melodiju spisał bě Peter Gläser. Tež na jubilejnym akustikowym koncerće interpretowaše Thomas „Monster“ Schoppe tónle spěw ze wšej swojej čućiwosću.