Budyšin (CS/SN). Po tuchwilnym stawje maja so Budyske Wjacławske wiki wot 26. nowembra hač do 22. decembra přewjesć. Tole praješe wyši měšćanosta Alexander Ahrens (SPD) wčera na nowinarskej rozmołwje. Njewěstosće pak wostawaja, dokelž móhli so zakonske postajenja hač do toho změnić.
Wiki drje budu w blišej wokolinje jeničke. Ćim wažniše je, zo so wone tež wotměja. Wšako ma město wothłosowany hygienowy koncept. Tak dźěla je do přebywanskeho wobłuka na Žitnych wikach a Hłownym torhošću, hdźež poskićeja jědźe a napoje, kaž tež do dundanskeho areala na Bohatej hasy, hdźež budu wšitke dalše předawanišća. „Apelujemy na zamołwitosć wopytowarjow, zo bychu wotstawki dodźerželi“, Ahrens wuzběhny. Dyrbjało-li pak krajne knježerstwo wuměnjenja přiwótřić a prawidło 3G, 2G abo samo 1G zawjesć, bychu hodowne wiki wotprajić dyrbjeli. Wotstawkow dla je mjeztym hižo lodowa čara na Butrowych wikach wotprajena. Měšćanske zarjadnistwo wočakuje lětsa mjenje wopytowarjow z Čěskeje a Pólskeje. Tam su tež mjenje wabili.
