Pola Horow ma 33 hektarow wulki solarny park nastać
Hory (AK/SN). Sewjerowuchodnje přemysłownišća pola Horow blisko Wojerec ma hač do kónca lěta 2023 něhdźe 33 hektarow wulki solarny park nastać. Blisko bywšeje sušernje ma so wón při Ptačečanskej dróze hač k tak mjenowanej južnej hrjebi wupřestrěć. Za tónle projekt budźe twarski plan nastajeny, kaž su radźićeljo gmejny Halštrowska Hola na swojim wčerawšim posedźenju z jednym napřećiwnym hłosom wobzamknyli. „Płonina so za to derje hodźi“, rjekny wjesnjanosta Dietmar Koark (CDU).