Na italske, grjekske a turkowske hosćency smy so dawno zwučili. Mnozy pak spytaja tež kulinarisce swój horicont rozšěrić. W Budyšinje maš k tomu nětko dobru składnosć.
Budyšin (WL/SN). Skónčnje! Předwčerawšim krótko do připołdnja bu z nowym wobchodom „Sushi a wjace ...“ kulinariski njedostatk w Budyšinje wotstronjeny. Přeco zaso běchu so w zašłosći wobydlerjo a hosćo sprjewineho města wobhonili, hdźe móhli sej tule wosebitu azisku jědź jako zakusk kupić. Dotal to mjenujcy w tajkej formje móžno njebě. Zo so tónle njedostatk nětko zhubi, wo to stara so wowka Van ze swojim zakuskom na Nutřkownej Lawskej 12 hnydom pódla Lawskeje wěže. Kupc smě sam rozsudźić, hač skazane jědźe hnydom na městnje pospyta, abo hač sej je sobu wozmje.
