We wjelelětnym rozestajenju mjez Trjebinskej gmejnu a tamnišim sportowym towarstwom Trjebinskeho towarstwoweho domu dla so nětko dalši wjeršk připowědźa. Hač hodźi so wón hišće wotwobarać?
Trjebin (CK/SN). Wohnjoškitneje kontrole w Trjebinskim towarstwowym domje dla ma so přećiwo čłonam tamnišeje wohnjoweje wobory chłostanske přizjewjenje mylenja domjaceho měra dla zapodać. Wjesnjanosta Waldemar Locke (CDU) bu spočatk nowembra informowany, zo běchu w objekće pječa wohnjoškitne durje manipulowane. Dokelž jedna so wo zjawne twarjenje, za kotrež je gmejna zamołwita, dyrbješe wón jednać. Kaž Locke na zašłym posedźenju gmejnskeje rady informowaše, je wón wobornikam nadawk dał tam za prawym hladać. Kaž so při kontroli 8. nowembra wukopa, běchu mjez druhim wohnjoškitne durje z klinami wuzběhnjene a jedyn zamk zalěpjeny. „Takle njesmě so ze strowotu ludźi wobchadźeć“, praji wjesnjanosta a skedźbni na zakonske předpisy. Mjeztym wón wobžaruje, zo njeje naležnosć hnydom wozjewił.
