Premjera prěnjeje Kulowskeje adwentneje online-protyki je mnohich překwapiła. Z njej maja w dohodownym času kwis, na kotrymž móža so zajimcy wšěch generacijow z Kulowa, wokoliny a wšeho swěta wobdźělić.
Kulow (SiR/SN). Štóž sej adwentnu protyku w socialnymaj syćomaj facebook a instagram dokładnje wobhladuje tón zwěsći, zo so za kóždymi durčkami zajimawe hódančko chowa. Iniciator Mathias Kliemank, kiž je zdobom administrator zabawneje internetneje strony „Wittichenauer Blog“, je so prócował wopytowarjam poskitka zajimawe aspekty wo měsće posrědkować.
Srjedźišćo 24 durčkow su prašenja wo stawiznach města, tradicijach a nałožkach kaž tež wo aktualnych podawkach, podkładźene z datami a faktami. Podpěru dósta wón wot Beaty Hufnagel z měšćanskeho zarjadnistwa, jako chcyše wědźeć, kelko towarstwow a rjemjeslnikow je w měsće přizjewjenych. Informacije su wědyhódne. Wšako maja w měsće Kulowje a na wokolnych wsach něšto wjac hač 6 000 wobydlerjow. Tak skutkuje tam tuchwilu 40 towarstwow, a po statistice z lěta 2019 je 45 přemysłow přizjewjenych.
