Šula snano hakle jutry hotowa

štwórtk, 13. januara 2022
artikl hódnoćić
(0 )
Nowa bydlenska štwórć při Srjedźnym puću w Pančicach-Kukowje je tež lětsa jedyn z wulkich projektow mjenowaneje gmejny. Loni běchu jón zahajili, lětsa móhli prěnje swójby twarić započeć.  Foto: Feliks Haza Nowa bydlenska štwórć při Srjedźnym puću w Pančicach-Kukowje je tež lětsa jedyn z wulkich projektow mjenowaneje gmejny. Loni běchu jón zahajili, lětsa móhli prěnje swójby twarić započeć. Foto: Feliks Haza

Při ponowjenju kubłanišća něštožkuli šmórnyć dyrbjeli

Pančicy-Kukow (SN/MWj). „Lěto 2021 bě kaž za wšitkich druhich tež za gmejnu Pančicy-Kukow wšo druhe hač jednore.“ Takle zjima wjesnjanosta Markus Kreuz (CDU) wuwiće swojeje komuny w minjenych dwanaće měsacach. Jako wosebite wužadanje mjenuje wón dalši twarski wotrězk ponowjenja Šule Ćišinskeho. Tón měješe po spočatnych planach hižo w decembru hotowy być. Wyšich twarskich kóštow a pobrachowaceho materiala dla pak so dźěła dlija.

„Jeli wšitko derje poběhnje, budźemy snano jutry tak daloko, zo změjemy wšitko dočinjene“, wjesnjanosta Kreuz připowědźa. Ale što rěka dočinjene? Přiběracych pjenježnych wudaw­kow dla dyrbjachu hižo to abo tamne šmórnyć. Tak njemóžachu pinčne murje wusušić, a nowe hłowne zachodne durje dyrbja runje tak čakać kaž zapadne schodźišćo. Dalše wulke projekty loni běchu dokónčenje syće pitneje wody w Swinjarni, Kanecach a Jaworje, wotkryće noweje bydlenskeje štwórće při Srjedźnym puću w Pančicach-Kukowje a twar hłowneho puća w Kanecach.

wozjewjene w: Lokalka
Prošu přizjewće so, chceće-li komentar podać

nawěšk

nowostki LND