Móžnosće za připołdniši spar w Njeswačanskej pěstowarni rozšěrili

Njeswačidło (JK/SN). We wobłuku informacijow z gmejnskeho zarjada je Njeswačanski wjesnjanosta Gerd Schuster (CDU) čłonam gmejnskeje rady na jich minjenym posedźenju zdźělił, zo bě njedawno kontrola wokrjesneho młodźinskeho zarjada w tamnišej pěstowarni. ­Radźićelam wšak je znate, zo njejsu městnostne poměry pěstowarnje runje najlěpše. Kaž wjesnjanosta rjekny, njemějachu tam dotal dosć móžnosćow za připołdniši spar dźěći. Njebě cyle jednorje dosć ruma, trěbne łoža nastajić. Hromadźe z wjednistwom pěstowarnje a ze zastupjerjemi młodźinskeho zarjada so poradźi dotalny běrow přerjadować na rumnosć, do kotrejež so dwuposchodowe łoža hodźa. Wulkosć stwy wotpowěduje postajenjam zakonja a zaruča dźěćom trěbny wotpočink. Wšako hodźa so wokna wotpowědnje zaćěmnić. Jenički problem kubłarkow je, zo běchu w běrowje wulki dźěl žadaneho běrokratiskeho dźěła wukonjeli, štož dyrbja nětko pak doma pak z laptopom na klinje zmištrować.