Symjo měnjeć lětsa na hinaše wašnje móžno

srjeda, 16. februara 2022
artikl hódnoćić
(0 )
Při zachodźe do Stróžanskeho Domu tysac hatow wuhladaš tónle kašćik, w kotrymž je najwšelakoriše symjo.  Foto: Meike Biskop Při zachodźe do Stróžanskeho Domu tysac hatow wuhladaš tónle kašćik, w kotrymž je najwšelakoriše symjo. Foto: Meike Biskop

Stróža (SN/MWj). Hišće hač do 20. februara móža zajimcy na dwěmaj městnomaj w biosferowym rezerwaće Hornjołužiska hola a haty symjo měnjeć a runočasnje k mnohotnosći rostlin w zahrodkach regiona přinošować. Štóž tele dny Dom tysac hatow w Stróži pola Hućiny abo Ladušec ratarski statok w Chrjebi-Nowej Wsy wopyta, wuhlada tam oranžobarbny kašćik. Tón je z najwšelakorišim symjenjom napjelnjeny. „Našeje w biosferowym rezerwaće wotměwaceje so měnjenskeje bursy za symjo nochcychmy so lětsa hišće raz wzdać. Tohodla smy hromadźe z Towarstwom za zachowanje mnohotnosće wužitnych rostlin (VEN) symjenjowe kašćiki nastajili. Tak móža ludźo swoje symjo měnjeć a přiwšěm předpisany wotstawk dodźeržeć“, rozprawja Susanne Bärisch ze zarjadnistwa biosferoweho rezerwata w Stróži. Něhdy bě z wašnjom, zo ludźo sami ze swójskim symjenjom rostliny plahowachu. Tak wuwiwachu družiny, kotrež běchu regionej přiměrjene. Dźensa sej wjetšina symjo kupi. Bohužel je so tak wjele dobrych družin rostlin zhubiło.

wozjewjene w: Lokalka
Prošu přizjewće so, chceće-li komentar podać

nawěšk

nowostki LND