Po nowej pěstowarni katolskeje wosady měri so město Kulow na dalšu wulku inwesticiju. Prěnjorjadnje profitować budu z njeje wohnjowi wobornicy, skónčnje pak wšitcy wobydlerjo.

Kulow (AK/SN). Město Kulow dóstanje nowu, praktisku a mnohostronsce wužiwajomnu wohnjowobornu gratownju. „Nalěto 2023 ma hruby twar hotowy być. Potom slěduje nutřkowne wuhotowanje“, rjekny twarski nawoda města Stephen Rachel wčera, jako su zakładny kamjeń połožili.

Za planowanje a twar wudadźa 1,5 milionow eurow. Wudawki dźěla sej po třećinje město Kulow, Swobodny stat Sakska a Zwjazk z měšćanskotwarskeho programa Socialne město. Wuhotowanje wohnjowoborneje gratownje a wonkowne připrawy w cyłkownej sumje hišće zapřijate njejsu. Za to su próstwu wokrjesej Budyšin zapodali a nadźijeja so wottam 500 000 eurow, Stephen Rachel rozłoži.