Hdyž kóšty přichodne lěta rozrostu, je gmejna na to přihotowana
Ralbicy (SN/MWj). Tak kaž kóždy priwatnje tuchwilu začuwa, kak twarske kóšty rozrostuja, su tež komuny wot toho potrjechene, předewšěm hdyž so na wjetše projekty wusměrjeja, kaž čini to gmejna Ralbicy-Róžant. Jeje planowana nowa pěstowarnja a přetwar dotalneje na hort budźetej dohromady něhdźe połdra miliona eurow dróšej, hač dotal planowane.
Kaž wjesnjanosta Hubertus Ryćer (CDU) na wčerawšim posedźenju gmejnskeje rady zdźěli, powjetša so cyłkowne wudawki wot 7,1 miliona na nimale 8,7 milionow eurow. Za tule sumu mějachu radźićeljo wobzamknyć wobkrućenje wokrjesej, zo ma delanska gmejna wotpowědny swójski podźěl hač do kónca projekta w decembru 2026 w swojim planje zapisany.
