Lětsa 12. junija wola w mnohich gmejnach Budyskeho wokrjesa wjesnjanostu abo wjesnjanostku. Budźe to za mnohich z prěnich muži gmejnow napjaty a wosebity dźeń. Jedyn z nich drje budźe so tež za wólby w swojej gmejnje zajimować, ale njebudźe hižo tak wočakliwy kaž při dotalnych. Skerje změje wšu přičinu, so na přichodny, zasłuženy wuměnk wjeselić.

Franc Brusk je drje tón wjesnjanosta, nic jenož w Budyskim wokrjesu, z najdlěšej hamtskej dobu. Nimale poł lětstotka je wón na čole Worklečanskeje gmejny stał a móže nětko na jara wobšěrnu a dobru bilancu zhladować. Jako zamołwity muž za komunu a tak za jeje wobydlerjow je dožiwił najwšelakoriše časy a wuměnjenja, w politiskim kaž hospodarskim, ale tež komunalnym wobłuku.