Tež bjez žonjaceho ćaha w Kulowje sobotu karnewal knježił
Kulow (aha/SN). Wot lěta 1988 haja w Kulowje tradiciju, zo wuhotuja žony a holcy stajnje wot póstniskeje soboty do róžoweje póndźele swój karnewal z wulkim a pisanym ćahom. Před pjeć lětami, we wobłuku 30. žonjacych póstnic, bě tam dokładnje 89 wobrazow z 1 500 wobdźělnikami widźeć. Tež před lětomaj starachu so tam žony na něhdźe 2,5 kilometrow dołhej čarje w jednej z najwjetšich karnewalowych metropolow Sakskeje ze swojim mócnym „helaw“ wo wulkotnu naladu. To pak bě tehdy poslednje tajke wulkozarjadowanje, dokelž bě loni koronapandemije dla wšitko wotprajene. A zwjetša su póstniscy norojo tele postajenja w dalokej měrje akceptowali. Tež lětsa bě žonjacy karnewalowy ćah wotprajeny. Přiwšěm knježeše předwčerawšim w městačku nad Čornym Halštrowom póstniska nalada, móhłrjec pod dodźerženjom płaćiwych postajenjow. Něhdźe 400 Kulowčanow čakaše na torhošću před radnicu na póstniski ćah žonow. Tón drje njebě oficialnje připowědźeny, zaćichim jón přiwšěm wočakowachu.
