Na prěnim akciskim dnju wokrjesa so pjeć komunow wobdźěli
Pančicy-Kukow (SN/MWj). Prózdne piwowe bleše na kromje pućow, kofejowe nopaški wosrjedź lěsa, prózdne cigaretowe tyzki na chódnikach, papjerjane tity w přirowach – tajke a podobne wobrazy drje kóždy widźi, kiž z wočinjenymaj wočomaj po kraju chodźi. Přećiwo přiběracemu zanjerodźenju wobswěta organizuja přirodowa centrala Budyskeho wokrjesa, Njeswačanska přirodoškitna stacija, přirodoškitny centrum „Hornjołužiski hórski kraj“ a wotpadkowy zarjad Budyskeho wokrjesa sobotu, 2. apryla, prěni wotpadkowy akciski dźeń wokrjesa.
W pjeć městach a gmejnach chcedźa tón dźeń při pućach a dróhach, na nawsach a naměstach kaž tež w přirodźe preč ćisnjene wotpadki zběrać. Hižo loni běchu w někotrych městach a gmejnach towarstwa a priwatne wosoby wotpadki zběrali a tak na přiběracy problem njerjada w přirodźe skedźbnili. Zo by so wuskutk tajkeho hibanja hišće zesylnił, su lětsa wosebity akciski dźeń do žiwjenja zwołali.