CDU posćele Uda Wićaza do lětušich wólbow Budyskeho krajneho rady
Połčnica (WL/SN). Dotalny zastupowacy krajny rada Udo Wićaz je kandidat Budyskeho wokrjesneho zwjazka CDU za wólby krajneho rady 12. junija. Wón bu předwčerawšim we wobłuku zjawneje sobustawskeje zhromadźizny w Połčnicy z 80,63 procentami wotedatych płaćiwych hłosow nominowany.
Dotalny krajny rada Michael Harig znowa nastupił njeje. Tohodla namjetowaše wón w swojej funkciji wokrjesneho předsydy CDU Uda Wićaza za kandidata-naslědnika w zastojnstwje. Dalšich požadarjow njebě. „Přichod trjeba pochad“, argumentowaše Harig. Wón je nominowaneho za tele zastojnstwo wot wuzwolenja do zastojnstwa 1. přirjadnika w decembrje 2015 spěchował a wužadał.
