Mjeztym 25. króć su w Budyšinje Dźeń měšćanskeho lěsa přewjedli. Zašłu sobotu bě so na akciju 60 wobdźělnikow při wojerskim pomniku w Bělšecach zetkało, mjez kotrymiž běchu k wjeselu měšćanskeho zarjadnistwa mnohe swójby z dźěćimi.
Budyšin (CS/SN). Wosebje za młodych wobdźělnikow běše to rjany wulět, předewšěm jako dyrdomdej w přirodźe. Budyski financny měšćanosta dr. Robert Böhmer je hosći witał a rozjasnił městna, na kotrychž steja postawy sydom serbskich kralow. Ze zornowca stworił je figury kamjenjećesar a wuměłc Markus Herold, kiž ma swoju dźěłarnju w Bělšecach. Postawy dopominaja na bitwu mjez słowjanskimi kmjenami a wójskom Heinricha I. w lěće 928, w kotrejž buchu serbscy kralojo wot přećiwnikow wotzady morjeni. Po starej baji su sedźeli sydom serbskich kralow, kóždy na jednym kamjenju a su wuradźowali, kak móhli so Němcam wobarać a sej swobodu a měr zdobyć. W bitwje přisadźichu wšitcy sydomjo žiwjenje. Serbja, kiž běchu na kóncu bitwu dobyli, pochowachu kralow ze swojimi złotymi krónami na hłowje pod kamjenjemi, na kotrychž běchu sedźeli.