Po Łužicy debja tuchwilu zajimcy jejka, zo bychu z nimi rumnosće pyšili abo je jako dar rozdawali. W Brězowce ­(Halbendorf) su dźěći a młodostni ­dopokazali, zo wědźa jejka po serbskim wašnju debić.

Brězowka (JoS/SN). Brězowske jutrowne wiki su woprawdźita lokalna wosebitosć. Wšako kubłaja Brězowske swójby swój dorost k tomu, zo móža dźěći a młodostni na wikach hižo sčasom swoje wukonliwosće pokazać. Tak nastawaja hižo dołho do wikow woprawdźite drohoćinki, kotrež nazhonići a młodźi jejkadebjerjo potom na wikach jutrownych jejkow w Brězowce prezentuja. Dorost, kiž je tam zastupjeny, so lěto wob lěto dale wuwije, štož je wobstajnym wopytowarjam wočiwidne.