1 389 serbskich křižerjow jutrowne poselstwo wozjewjało

Wostrowc (SN/at). 68 křižerjow je so lětsa z Wostrowca do bliskeho klóštra Marijineho doła podało a so wo dobry wusyw modliło. Hižo do wotjěchanja so křižer při zalězenju na konja zrani, tak zo dyrbješe do chorownje. Dokelž stej propstownja a abtownja klóštra zaróštowanej, tak bě dorěčane, njeměli tam přihladowarjo być. Te tam tež njeběchu, ale parkowane awta, kotrež procesion mylachu. Z njeznateje přičiny njejsu kompleks trójce wob­jěchali, ale jenož dwójce. Nowostka bě na kóncu procesiona jěchanje přez kěrchow, to chcedźa přichodnje dale wobchować.
Njebjelčicy (SN/JaW). Štyri nowostki dožiwichu křižerjo, domoródni a hosćo w Njebjelčanskim procesionje. Prěni raz je Chrystof Mikławšk 104 křižerjow sylny procesion jako kantor nawjedował. Štyrjo křižerjo mějachu zeleny wěnčk a třo slěborny. Dale su Njebjelčanscy křižerjo prěni raz z nowych knižkow spěwali a po nowej čarje jěchali. Na dompuću njepo­dachu so kaž minjene lěta za Jaworu na statnu dróhu S 100, ale runu smuhu do Miłoćic.