Po lońšej přestawce zaso mejemjetanje po starym wašnju přewjedli
Radwor (mtw/SN). Při wonkownje optimalnych wuměnjenjach wotmě so wčera popołdnju mejemjetanje w Radworju. Suche wjedro a 20 stopnjow wabjachu wjacore sta wobydlerjow na nawjes. Tam jich Wulkodubrawscy muzikanća witachu. Loni je mejemjetanje w Radworju wupadnyło, 2020 je Radworska młodźina jako jenički młodźinski klub nałožk digitalnje přewjedła. Tehdy wudoby sej Matej Wjeńka myto mejskeho krala a wuzwoli sej Martu Hantušec za swoju kralownu. Dla lońšeje přestawki bě młodźina lětsa chětro napjata a so na wulki wjesny swjedźeń wjeseleše.