Budyšin (SN/bn). „Senftown Skatejam“ bě hesło sportoweho a takrjec ludoweho swjedźenja, z kotrymž towarstwje Kamjentny dom a Bautzen rollt nowy skaterowy park w Strowotnej studni wotewrištej. Ducenty wólnočasnych sportowčow a sportowcow kaž tež tójšto dźěći mjez druhim z Budyšina, Drježdźan a Pirny pokazachu minjenu sobotu něhdźe 250 zajimcam a njeznatej ličbje „njewobdźělenych swědkow“ (Zaungäste) na spektakularne wašnje swoje kmanosće na skateboardźe, rólkačach, inlineskaterach, rolerach a (BMX-)kolesach na arealu při Wobkruhu Strowotneje studnje, za kotryž bě město Budyšin něhdźe 440 000 eurow nałožowało. Organizatorojo dźakowachu so nimo wobdźělnikam, hosćom a podpěraćelam wuraznje Němskemu Čerwjenemu křižej, kotryž pak njeměješe hač na někotružkuli mjeńšu blesuru přewjele dźěła. Wo hudźbne wobrubjenje swjedźenja postarachu so DJjej Tropical Eden a Steve Osten, nawječor wustupichu młoda band Fallout z Kadłobje (Goldbach) pola Biskopic, feministiska (post-) punk-skupina Adrats z Drježdźan a lokalni matadorojo Big Trunk.