Naš wokrjes trjeba zhromadnu strategiju, zo byštej so wobě kulturje tu w sylnišej měrje hódnoćiłoj. Ze serbskeho dźěłoweho kruha mi přemało namjetow přińdźe. Serbska społnomócnjena je jeno za dźělny čas přistajena. Zo hodźeli so zajimy serbskeho ludu we wuskej zhromadnosći z tymi Němcow wobkedźbować, sym za pomjenowanje serbskeho přirjadnika, z kotrymž móžu na samsnej runinje a w zhromadnym dźěle bjezposrědnje we wokrjesu skutkować.
Dwurěčnosć jako znamjo jónkrótnosće měli bóle do wšědneho dnja zarjadnistwa a žiwjenja zapřijeć. Krajny rada, kotryž dwě rěči w swojim zarjadniskim wokrjesu zjednoća, měł tež serbšćinu wobknježić. Tohodla chcu z přikładom być a serbsku rěč nawuknyć. To nic jenož swojeho słowjanskeho pochada dla, ale dokelž serbski lud ze wšěmi swojimi tradicijemi bazowemu fundamentej wokrjesa Budyšin přisłuša.