Nimo dalšich insektow su předewšěm tež pčołki za přirodu nimoměry wažne. Často sej małe stworjenčka prawje wažić njewěmy. Tohodla so w lětnjej seriji na lokalnej stronje lětsa pilnym ­pčołkam a pčołarjam wěnujemy. (7)

Znaty Pěskečanski pčołar Beno Pólk narodźi so w druhim lěće Druheje swětoweje wójny jako najmłódše ze sydom dźěći. Derje so wón dopomina, što rěka w chuduškich poměrach, ale přiwšěm z lubosću maćerje kubłany wotrosć. Nan Jan Pólk so hakle 1949 z wójnskeje jatby nawróći.

Při kóždym wjedrje nóžkowaše mały Beno ze šěsć dalšimi Pěskečanskimi dźěćimi do Njebjelčanskeje šule. Ze 14 lětami poda so do Drježdźan, zo by so na dróhotwarca wukubłał. Po dwěmaj lětomaj złoži tam fachowe pruwowanje a bu w Kamjenskim dróhotwarskim zawodźe přistajeny. 47 lět je tam hač do wuměnkarskeje staroby dźěłał. W lěće 1965 woženi so z Angelu Koklic ze Smjerdźaceje.