Serbske Pazlicy (AKR/SN). Lětsa móžachu Serbskopazličenjo zaso raz porjadnje wjesny swjedźeń woswjećić. Běchu to zabawne tři dny na swjedźenišću při sportnišću. Pjatk wječor zahajichu swjedźeń z natočenjom piwa. Wubědźowanje hornjeje přećiwo delnjej wsy móžeše delni dźěl wsy za sebje rozsudźić. Wobdźělnicy dyrbjachu na přikład z łopaču bul žonglěrujo napřemo běhać, powjaz ćahać abo piwowe kašćiki staplować. Při ćmičkanju čakaše na dźěći lampionowy ćah po wsy z přewodom akordeonowych zynkow. Derje wopytany wječor wuklinča z diskoteku Melodija a DJjemi.
Sobotu steješe na programje tradicionalny koparski turněr, na kotrymž wobdźěli so šěsć mustwow. W napjatych bojach přesadźichu so Njebjelčicy před Serbskimi Pazlicami a Hórkami. Za dźěći bě paslenje spřihotowane, při kotrymž nastachu mjez druhim drjewjane taflički, debjene z kamjenjemi. A wězo njesmědźachu słódne wafle k swačinje pobrachować. Na wječorne reje přeprosy skupina Logarithmus z přewažnje serbskimi štučkami a pozdźišo zaso DJ, zo by so wosebje młoda generacija wucychnować móhła.