Někotre zajimawe ličby z hospodarskeho plana gmejny rozjimali

Pančicy-Kukow (SN/MWj). Gmejna Pančicy-Kukow ma nětko wobzamknjeny hospodarski plan. Wón bě hač do kónca junija zjawnje wupołoženy, nichtó pak do njeho pohladnył njeje a tež žane zapodaća dóšli njejsu. Tak móžachu radźićeljo na swojim zašłym posedźenju dokument schwalić.

W tym zwisku skedźbni wjesnjanosta Markus Kreuz (CDU) na někotre zajimawe ličby. Tak płaća wobydlerjo dohromady 230 000 eurow ležownostneho dawka, čehoždla mnozy měnja, zo měła so komuna bóle wo porjadk starać. Ale jeničce personalne wudawki za sobudźěłaćerjow komunalneho twarskeho zawoda tule sumu překroča. Dale płaća dohromady 483 000 eurow za přiražki pěstowarnjomaj w Pančicach-Kukowje a we Wotrowje. Hišće wjace wučinja wokrjesny wotedawk, kiž poćežuje gmejnsku kasu ze 670 000 eurami. A skónčnje tež zarjadniski zwjazk Při Klóšterskej wodźe sobu financuja, a to lětsa z 380 000 eurami.