Nimo dalšich insektow su předewšěm tež pčołki za přirodu nimoměry wažne. Často sej małe stworjenčka prawje wažić njewěmy. Tohodla so w lětnjej seriji na lokalnej stronje lětsa pilnym pčołkam a pčołarjam wěnujemy. (16)
Z busom Radworskeho Šmitec wozydłownistwa su so hrajerjo na europske koparske mišterstwa awtochtonych narodnych mjeńšin podali a z nim su so po wuspěšnym wobdźělenju zaso nawróćili. Zo mějachu za wodźidłom busa z 48lětnym Pětrom Wenclom wuběrneho šofera, je móhł kóždy sobujěducy nazhonić. Zo pak je tež agilny a mjeztym wuspěšny pčołar, su hakle pozdźišo zhonili.
Wotrostł je 1974 rodźeny Pětr Wencl w Kamjenej pola Radworja w ratarskej swójbje. Swoje narodne a nabožne kubłanje kaž tež hłuboko zakótwjenu lubosć k přirodźe je sej wón hač do dźensnišeho wobchował. Wuchodźiwši 1991 wuspěšnje 10. lětnik w Radworju nawukny blidarstwo we Łuze. Wušikny je w swojim powołanju nimale tři lětdźesatki dźěłał. Mjeztym wodźi bus po dróhach cyłeje Němskeje a hdyž je trjeba tež daloko za hranicy kraja.