Při přećahowanju ma biblioteka tójšto pomocnikow

póndźela, 05. septembera 2022
artikl hódnoćić
(0 )
Čłonojo spěchowanskeho towarstwa Kamjenskeje měšćanskeje biblioteki pomhaja tuchwilu při přećahowanju zarjadnišća do noweho domicila na Wuchodnej dróze.  Foto: Měšćanska biblioteka Čłonojo spěchowanskeho towarstwa Kamjenskeje měšćanskeje biblioteki pomhaja tuchwilu při přećahowanju zarjadnišća do noweho domicila na Wuchodnej dróze. Foto: Měšćanska biblioteka

Kamjenc (SN). Za zawrjenymi durjemi měšćanskeje biblioteki w Kamjenskim Lessingowym domje tuchwilu inwenturne lisćiny přirunuja a wjace hač 33 000 medijow z tak mjenowanej RFID-techniku wuhotuja. Něhdźe 6 000 słuchoknihow dóstanje nowe etikety a stabilne wobalki. Přichodne tydźenje wšitko krok po kroku na Wuchodnu dróhu 16 dowjezu, hdźež změja medije swoje doskónčne městno. Zo bychu wšitko zmištrowali, je kóžda podpěra witana. Sobudźěłaćerjo so tuž přez pomocnikow ze spěchowanskeho towarstwa wjesela.

Přiwšěm maja sobudźěłaćerjo biblioteki dźěła dosć. Woni připrawjeja napisy, zarumuja polcy, kamory a pisanske blida, přihotuja tři dny trajacy swjedźenski program a zadźěłuja dweju abiturientow do jeju dobrowólneje słužby. Nimo toho dyrbi team nowe rumnosće biblioteki runje tak zeznać kaž nowu techniku. Wšako dyrbi 30. septembra wšitko fungować. Potom mjenujcy měšćansku biblioteku na nowym městnje w Kamjencu wotewru. Tuta změje swój domicil w nowym twarjenju Lessingoweho gymnazija.

wozjewjene w: Łužica
Prošu přizjewće so, chceće-li komentar podać

Serbska debata

nowostki LND