Radźićeljo rozsud wjesnjanosty wo twarskich dźěłach wobkrućili
Pančicy-Kukow (SN/MWj). Twarske dźěła na hłownej dróze w Kanecach maja přichodny tydźeń widźomnje pokročować. Póndźelu mjenujcy chcedźa dalši dźěl dróhi asfaltować započeć. Móžno, zo změja wutoru hižo dočinjene. Tole zdźěli wjesnjanosta Markus Kreuz (CDU) na wčerawšim posedźenju gmejnskeje rady Pančicy-Kukow.
Po dorěčenju z Drježdźanskej planowanskej firmu je wjesnjanosta nadawk we wobjimje wjace hač 35 000 eurow přepodał Biskopičanskej dróhotwarskej firmje. Wčera su gmejnscy radźićeljo tónle rozsud takrjec wotžohnowali. Trěbne tele postupowanje bě, dokelž bě poskitk firmy jenož hač do 4. oktobra płaćiwy. Tón dźeń bě wjesnjanosta runje hakle z dowola wróćo a je dobu wo štyri tydźenje podlěšił. Dokelž pak krótkodobnje žane posedźenje gmejnskeje rady zwołać njemóžachu, dyrbješe wjesnjanosta naležnosć w zajimje gmejnje sam rozsudźić.