Klětno (AK/SN). Na Klětnjanskim pobrjohu Bjerwałdskeho jězora ma funkcionalne twarjenje z běrowom přistawneho mištra a sanitarnymi připrawami nastać. 90 procentow kóštow maja z hornca za strukturnu změnu dochadźeć. Hamorska gmejna ma dźesać procentow jako swójski podźěl zapłaćić, štož wučinja něhdźe 75 000 eurow. Spočatnje běchu z 43 000 eurami ličili. Swójski podźěl zapisaja nětko do hospodarskeho plana 2023/2024. To je gmejnska rada na swojim zašłym posedźenju wobzamknyła.
„Sanitarne twarjenje je nuznje trěbne“, podšmórny přistawny mišter Gerhard Stübner. „Je-li Klětnjanski přistaw z 90 procentami wućeženy, mamy hač do 400 hosći. Za nich mamy tuchwilu jenož jedyn nuznik za muži, jedyn za žony a jednu dušu“, praji Stübner. Wjetše čołmy drje maja swójski nuznik, njemóža pak je wuprózdnić, dokelž wotpowědnu technisku připrawu w přistawje wužiwać njemóža. „Wobstejnosće su jara ćežke“, Stübner zjima.