Budyšin (CS/SN). Zajimcow za słužbu pola sakskeje policije je po wšěm zdaću dosć. To pokaza minjenu sobotu dźeń wotewrjenych duri na Wysokej šuli sakskeje policije w Budyšinje cyle wočiwidnje. Předewšěm młodźi ludźo přichadźachu ke kampusej na Kantowej, zo bychu za kulisy wukubłanskeho centruma pohladnyli. Zaměr organizatorow bě, cyłu šěrokosć wukubłanja a dalekubłanja pola policije předstajić.