Njeswačidło (JK/SN). Mějachu hižo plany a konkretne předstawy wo tym, kak zapołoža nowe pućowanske šćežki a informaciske tafle a kak wožiwja přirodny turizm w gmejnje. Ale nětko je wšo nimo: Njeswačanska gmejna njebudźe definitiwnje dźěl biosferoweho rezerwata Hornjołužiska hola a haty.

Přisłušnosć by gmejnje mnohe lěpšiny a spěchowanja nastupajo přirodoškit a turizm wobradźiło, štož by tež financielne lěpšiny přinjesło. Rozsud susodneje Radworskeje gmejny, zo biosferowemu rezerwatej njepřistupja, so tež na Njeswačidło wuskutkuje. Kupowe rozrisanje, zo njeby Njeswačanska gmejna direktny zwisk z rezerwatom měła, njehodźi so zwoprawdźić a njeje scyła móžne. To wopodstatni a wujasni Njeswačanski wjesnjanosta Gerd Schuster (CDU) na minjenym posedźenju gmejnskeje rady. Njedawne wuradźowanje fachowcow Sakskeho statneho ministerstwa za energiju, škit klimy, wobswět a ratarstwo, nawodnistwa biosferoweho rezerwata a wobdźělenych gmejnow w Stróži skónči so z faktom, zo Radworska gmejna rezerwatej njepřistupi a tež Njeswačanske nadźije so z tym rozbija.